Musee 最出名就梗係激光脫毛啦！不過原來我search下先知都有眼袋槍做架喎！佢地個眼袋槍係叫 Musee Exilis Ultra 360 第4代眼袋槍，話係全面升級版本，咁我就唔知升級左啲咩啦，不過佢地有三個宣傳重點就係淡化黑眼圈、減眼紋同去水腫，然後就係360度探頭、無恢復期同無創無痛.....
不過其實最吸引係佢地版面個張鬼婆既Before 同 After 相！
如果無睇過就可以去Musee官網睇下，唔知係咪P過，總之就好鬼吸引！
個鬼婆張Before同after相好似後生左20歲咁，我都唔洗後生20歲，大概10歲其實就OK！
我相信如果想做眼袋槍既話，一早都做左好多關於眼袋槍既功課架啦，咁我都唔特登去介紹，淨係講下去Musee 做療程既體驗啦！佢地用既係BTL機！
我無跟醫美資訊跟得好貼，所以唔知第4代同之前有咩分別，唔好問我！
——呢條係上去Musee試做既分隔線——
我首先係Musee官網預約左個眼袋槍先，登記完就可以去試一試，其實以我試左好多醫美療程既經驗黎講，試打幾野，係無咩效果可以睇到既，如果間間都用同一部機（即係BTL）咁上去試機其實唔係試效果，係試個上美容院成個流程，同埋療程既感受（就算個療程真係好有效，你打一下光就痛到七彩、淚流滿面，完全痛到你頂唔順，除非你鐘意死頂，如果唔係都會揀另一個療程）不過注意返，能量太高同太低都唔係好事，打太多發或太少發都唔得架......
打太多可能會搞到皮膚過曬敏，太少又無野睇。
都係要你同個治療師自己夾返啦。
好，廢話講完，講返我上Musee試做究竟咩Fu先。
Musee顧問一黎就話我皮膚差！我做眼架喂！
咁去Musee櫃檯位check in完就等顧問帶我入房，櫃檯小姐態度好好，好nice，個顧問又好快出黎接我，個陣感覺其實都幾好，但點知一坐落去、除口罩，就開始黎料......
連名我都唔記得既美容顧問一黎料就話「係喎皮膚係真係差啲喎」，我都打左個突，淨係可以尷尬打哈哈應佢2、3句話係呀因為最近返工好忙要OT、又要熬夜，所以殘左啲囉，不過我係黎試做眼既，因為黑眼圈同眼袋仲勁呀......
我都唔係太知道點解要踩自己黎化解尷尬(That’s me）
跟住個顧問就仔細睇左一睇我對眼，就話「哇做咩搞成咁呀阿妹」.....我真心懷疑Musee呢度啲人係咪唔識講野，「個態度永遠都似去拜年既時候比人披住「親戚關心你、淨係得我先同你講真說話」呢塊皮去行侮辱你之實。
呀，呢個顧問真係唔係流架喎，句句都令我唔知點接話。
之後佢就話睇黎我都有好多問題要執執，我地有好多野做呀，然後就幫我做左個皮膚分析......我喺顧問房既全程就係比人由頭sell到落腳，sell我「可能需要但暫時無興趣」既皮膚療程，當然，Musee Exilis Ultra 360 第4代眼袋槍我就梗係要買啦（佢覺得），但係如果唔買埋其他skin care療程，塊面都係分分鐘會爆炸......
我係呢10分鐘過程入面要不斷提醒返佢，我只係黎Musee試做Exilis Ultra 360 第4代眼袋槍架咋，係試做，試做眼袋槍之前我係唔會買任何療程架OK？（而且一黎已經咁煩我都真係唔敢買，因為買完都肯定會Up sale又up sale！）
呢10分鐘真係漫長過咩，聽我口吻咁堅決，甚至reject埋佢話要「免費送俾我試既面部療程」之後佢終於黑面，佢肯定覺得我上黎呃做Exilis Ultra 360 第4代眼袋槍，浪費佢時間，我反而覺得係佢浪費我時間......佢仲要夠膽死強調，其實個試做係試下個療程感受架咋喎，未必睇到效果架，但如果你做8次定10次就一定有效果睇到，黑眼圈消失、眼紋唔見、眼袋無埋......
佢講買幾送幾，圍返幾錢一次全個市場或者全個地球最抵我根本都無聽.....
終於，講到大家都好唔耐煩之後佢就送我入房，入到房個咩都無，我又唔知要做咩，成碌木咁企係度，Musee個顧問咩都無講就走開，嬲嬲豬！都好呀，我希望佢唔好再煩我，呢個時候我已經諗左快啲搞完快啲走，淨係因為Musee呢個顧問我都唔會買任何野！
我訓上床可能有5至10分鐘，到我非常唔耐煩，唔想再浪費時間，想直接走人既時候，個治療師就黎左。因為治療師都幾nice咁所以我先留返低，成程個治療師除左交代佢下一步會做咩，都無咩特別交流，我都幾欣賞佢呢點。
但如我所料啦，Exilis Ultra 360 第4代眼袋槍個試做其實就係清潔左眼周之後就上啲gel，用機頭碌兩邊眼，碌呀碌呀碌......碌呀碌呀碌，體感好似碌左大概3分鐘定5分鐘就叫我起身，因為係試做呀嘛！
起身既時候我都真係鬆一口氣，因為只要逃離埋個顧問就可以走啦！
喺呢度我都教大家一招，只要你唔尷尬，尷尬既就係其他人！
個顧問出黎接我，係咁話要我入房簽埋名先叫完結呢個療程喎（又想困我入房傾多15分鐘？）我梗係唔濟啦！我話我趕時間呀，會返去慢慢考慮個療程先決定買唔買架啦，但佢當然又再叫我入房影相，睇睇做眼袋槍前後個before同after差幾遠呀嘛......仲要簽名代表接受左個療程呢！
其實我覺得做完療程簽名都幾好笑，因為一黎我無比錢，二黎你都唔會再見到我架啦，求其畫隻龜咪得囉！於是我一路話趕時間一路衝去門口，因為如果你真係咁需要我個簽名，你會拎塊板衝出黎比我畫龜架啦？都唔洗幾秒係咪？
到最後我企係Musee個門口前面等開門，佢黑曬面咁捺開門鍵，我就出左去，大家都黑曬面一聲都無講到，Nice！雙贏！正呀！
第二間我去試既就係New Beauty既皇牌既R6包去眼袋療程！
無他，我有時間，而佢係免費體驗呀嘛？
同樣地，其實我對個New Beauty試做既效果都不抱咩期望，就係試下個流程點同職員態度，因為我覺得啦，大公司用既機全部都差唔多，最重要都係態度，如果感受好唔hardsale，即係代表之後upslae機會都唔大，咁我就比貴少少都值！
因為時間就係金錢！
同樣都係去New Beauty官網預約左R6包去眼袋療程就得，然後準時上去啦，最好準時上去如果唔係你就唔會知美容院實際個輪候時間係幾長，安排房安排得好唔好，呢度都係要考慮在內架！
——呢條係上去New Beauty 試做R6包去眼袋療程既分隔線——
去到New Beauty有花茶飲，幾好。
去到無耐就有顧問出黎接我，我拎住杯熱茶入佢房，等唔夠幾分鐘就入房，呢樣都幾好！
之後我除口罩，佢邊招呼我邊睇下我填既資料，雙方閒聊幾句都無咩講廢話，直接就做皮膚測試，爽快俐落睇結果，而唔係用眼睛scanner，呢樣野我都要比個讚佢！
顧問話你今日係上黎試R6去眼袋療程，咁我地重點就睇眼啦！
New Beauty顧問好仔細問埋我嘅生活習慣，同埋平日點保養對眼，會同我分析點解我黑眼圈同眼袋咁犀利！佢覺得我係因為用電腦同手提太多，對眼太攰同新陳代謝差，所以就令對眼睇落去好水腫、好攰，成日都無黎精神咁......
不過佢到最後都好專業講左句，其實黑眼圈同眼袋成因都有好多，亦都會隨住年紀增加而變得有啲分別，我地都係集中返處理改善，好過坐喺度尋根究底！
廢話唔多講！顧問好快就帶左我入去試R6包去眼袋療程，New Beauty嘅治療師感覺好專業又好nice，手腳又俐落又溫柔咁幫我抹面，邊做基本清潔就邊解釋返個療程原理，而且我都覺得講得好實在，唔會好誇大其詞！
治療師話R6包去眼袋療程使用嘅係醫療級RF射頻技術，可以去到眼皮真皮層，配合紅、藍光光源，【促進眼袋多餘脂肪排走，促進眼眶血液循環，疏通淋巴及氣血，加速排走脂肪、水分及毒素】喎！
係，呢段係上返佢地New Beauty官網抄既，因為治療師講左N咁多樣好處，但係我就記唔曬，總之就可以去黑眼圈去眼袋啦！
雖然係試做，但係治療師一啲都無Hea，好仔細咁每邊眼都碌左好耐，佢碌得耐到我差唔多要問「其實呢個療程係咪要俾錢」(不過我梗係控制住無問)同埋如果碌既時間可以分配落塊面度就好啦LOL！
治療師話療程完啦既時候我仲睇一睇錶，做左成二十幾分鐘！足足二十幾分鐘即係一隻眼做成十幾分鐘！咁樣效果其實點會唔好？（畢竟佢地做得咁耐）咁都預左望鏡會有咩效果，就睇到對眼無再水腫、浮腫，眼皮都拉高埋，黑眼圈減淡曬同眼袋近乎無......
不過，呢個即時效果係可以預見既，都係要返去睇下維持得幾耐！
驚New Beauty個顧問會sell我，我連表情都有啲僵硬，不過好彩，出到去入左房，顧問邊比我簽名邊話呢度就無強迫既，你覺得好就買，$1888有10次，如果你覺得唔好亦都唔會刻意留人架！佢咁既態度就令我覺得，New Beauty真係大公司所以唔差在一兩個客，未至於要去到圍人......
所以我都好誠實同佢講，我係覺得New Beauty嘅接待、流程同效果都好專業好細心，人都好nice，但做完眼袋槍療程點都會有即時效果，我都係想返去等多幾日、睇真啲先決定買唔買......而佢都表示合理，好理解！
我就係特別受唔到hardsell既人，所以都覺得New Beauty佢地呢套反其道而行既策略幾好，老土啲黎講，有係有麝自然香啦！好似你唔買都OK，因為佢地仲有好多其他客！
所以我都係度放New Beauty條Link，總之你click入去佢官網填表，如果係新客就可以做一次免費療程架啦！見人之前預時間上去做一做，抵玩！
免費體驗：New Beauty R6 包去眼袋療程
留言列表
